اسمي جمالات مش جمال.. لقطة طريفة لسيدة الإسماعيلية اللي رجعت لأسرتها بعد 55 سنة غياب♥
حكاية أغرب من الخيال
تخيلوا واحدة تاهت وهي طفلة عندها 8 سنين، تفضل 55 سنة من عمرها عايشة وهي مش عارفة أهلها فين، ولا عارفة توصل لبيت أبوها وأمها، وكل اللي جواها إنها نفسها تشوف إخواتها وتعرف أصلها وحكايتها بدأت منين.. وفجأة، بعد كل السنين دي، تلاقيهم!
الحكاية بدأت من 55 سنة، لما الحاجة جمال كانت طفلة صغيرة، وراحت مع جدها وأخوها تتفسح في القاهرة، لكن في وسط الزحمة تاهت منهم، ولقت نفسها لوحدها في محطة أتوبيس في الدقي، والليل بدأ يدخل عليها.
ست شافتها قاعدة لوحدها، وسألتها عن أهلها وبيتها، فقالت إنها من الزقازيق، وناحية القصاصين، بس البنت الصغيرة مكنتش عارفة توصف الطريق ولا تحدد مكانها بالظبط، فالست خافت تسيبها لوحدها في الشارع، وخدتها معاها لبيتها، وقالت هتخليها تقعد عند والدتها ومرات أخوها في الروضة.
هناك سألوها عن اسمها وأهلها وعنوانها، وقدرت تقول شوية معلومات فاكراها، لدرجة إن جوز واحدة من الستات، وكان ظابط، حاول يساعدها، وعملها نداء في الراديو ونشر اسمها في الجرايد، على أمل إن أهلها يسمعوا أو يشوفوا الإعلان ويوصلوا لها، بس للأسف محدش ظهر، خصوصاً إن الزمن ده مكنش فيه نت ولا سوشيال ميديا زي دلوقتي.
الحاجة جمال مكنتش مرتاحة في المكان، وفضلت تقول إنها عايزة تمشي وتدور على أمها، لحد ما واحدة من الستات قالتلها إنها بتحب تربي اليتامى، وإنها مش هتسيبها، خصوصاً بعد ما عرفت إن أبوها متوفي، فخدتها تعيش معاها، وهناك بدأت رحلة جديدة في حياتها.
الست ربتها وسط ولادها الاتنين وبنتها، وكانوا بيحبوها ويدلعوها، ويجيبولها الحلوى والشوكولاتة، ولما عرفوا إنها بتحب العرايس كانوا يجيبولها الخيط والإبرة والعرايس عشان تسلي نفسها، بس طفولتها راحت من غير ما تدخل مدرسة، لأن الست كانت خايفة عليها ومبتخرجهاش.
كبرت جمال وهي لسه مش عارفة توصل لأهلها، ولما احتاجت تطلع بطاقة اضطرت تعملها باسم غير اسمها الحقيقي، لأنها مكنش معاها ورق يثبت شخصيتها، وعاشت سنين طويلة وهي شايلة جواها حكاية إنها بنت تايهة عن أهلها.
مرت بتجارب خطوبة كتير، لحد ما قابلت راجل أكبر منها في السن، واتجوزته، وبتقول إنها عاشت معاه أحلى أيام عمرها، لأنه كان حنين عليها جداً، وكان عارف حكايتها، وكل شوية يسألها لو عايزة تدور على أهلها، ويعرض عليها يروح معاها، بس كان بيعاني من ضعف في النظر، وتوفى من سنة تقريباً.
ورغم إن جوزها كان سند ليها، حلم الوصول لأهلها مخرجش من قلبها، وكانت بتحاول تدور عليهم من وقت للتاني، بس من غير نتيجة، لأنها ساعات كانت بتقول عنوان غلط أو بتوصف مكان مش هو المقصود.
وفي الناحية التانية، كانت فيه أسرة عايشة على أمل رجوع بنتها اللي اختفت وهي طفلة، إخواتها الستة فضلوا يدوروا عليها ويسألوا في كل مكان، وأخوها بيحكي إنه راح مصر والبحيرة والسادات ودمياط، وسأل في أماكن كتير، بس كل الأبواب كانت مقفولة.
والدتها ماتت وهي شايلة حسرة فراق بنتها، وكانت دايماً تقول إن أكتر حاجة وجعاها إنها مش عارفة بنتها راحت فين، وإن نفسها تشوفها قبل ما تموت، وأختها الكبيرة كمان فضلت طول السنين دي متمسكة بالأمل، وكانت بتطمن أمها وتقولها إن أختها هترجع في يوم من الأيام.
لكن المفاجأة بدأت لما الحاجة جمال، بعد وفاة جوزها، حست إنها مش قادرة تكمل حياتها لوحدها، خصوصاً بعد ما واحدة قريبة منها دخلت العناية المركزة وتوفت بعدها بيومين، والموقف هزها من جواها وخلاها تخاف من الوحدة، وقررت إنها لازم توصل لإخواتها مهما حصل.
في الوقت ده لجأت لقريب جوزها، اسمه محمد مسعد، اللي كان بيشتغل في شركة فوري، وحكتله إنها تايهة من إخواتها من 55 سنة، وإن نفسها تشوفهم قبل ما يفوت العمر.
محمد سألها عن أسماء إخواتها وأبوها وأمها، وكانت رغم مرور كل السنين لسه فاكرة الأسماء، وكمان فاكرة شوية تفاصيل عن بلدها، بس كانت فاكرة إنها ناحية الزقازيق.
بدأ محمد يسأل ويدور، واكتشف إن فيه أكتر من مكان اسمه القصاصين، وإن الوصف اللي بتحكيه مش متطابق مع المكان اللي كانت فاكرة إنه بلدها، فطلب منها تحكيله تفاصيل أكتر عن الطريق.
وهنا بدأت خيوط الحكاية تتجمع، لما وصفتله إنها كانت بتعدي البر للناحية التانية من البحر عشان تركب، وإن فيه محطة قطر عند القصاصين، ووراها قرافة، وإن بلدهم اسمها عزبة العمدة.
محمد فهم إن المقصود هو عزبة العمدة التابعة لمنطقة القصاصين بمحافظة الإسماعيلية، وقرر يدور هناك، وبالفعل بدأ يسأل عن الأسماء اللي قالتها له الحاجة جمال.
والغريب إن جمال نفسها مكنتش مصدقة إن حد ممكن يوصل لأهلها بعد كل السنين دي، لحد ما محمد رجعلها وقالها إنه لقى المكان وإنه في محافظة الإسماعيلية، وساعتها اكتشفت إنها طول عمرها فاكرة المحافظة غلط!👇🏻(١)

























































































































































































































































































































































































































































































































































































































































































































































































































